როგორ დავიწყოთ ონლაინ შეკვეთები მაღაზიებთან: პირველი კვირის გეგმა

რატომ არ ღირს ყველა მაღაზიის ერთდროულად გადაყვანა

როცა დისტრიბუტორი ონლაინ შეკვეთებზე გადასვლას გადაწყვეტს, ხშირად ცდუნება დიდია, რომ ყველა მაღაზიას ერთდროულად მისწეროს. ეს იშვიათად მუშაობს: ზოგს ეშინია ახალი რამის, ზოგს დრო არ აქვს, ზოგს ისევ ტელეფონით უფრო მოსწონს. შედეგად რამდენიმე კვირა ორმაგად მუშაობთ, ზოგი შეკვეთა სისტემაშია, ზოგი ჩატში, და ყველაფრის აღრიცხვა უფრო რთულდება.

ბევრად უკეთესია პატარა დაწყება: პირველ კვირაში სულ სამი-ხუთი მაღაზია, ვინც თქვენთან ყველაზე ხშირად და ყველაზე მეტს უკვეთავს. მათთან ადვილად ისწავლით, რა უნდა აუხსნათ, სად ეშლებათ და რა გამოსწორდეს, სანამ დანარჩენებს მიმართავთ.

დღე 1-2: მოამზადეთ კატალოგი და ფასები

მაღაზია მხოლოდ იმას დაუკვეთავს, რასაც სისტემაში ხედავს. ამიტომ პირველ რიგში კატალოგი უნდა გქონდეთ.

დაიწყეთ 20-30 ყველაზე გაყიდვადი პროდუქტით, ყველაფრის ერთბაშად ატვირთვა საჭირო არ არის;
თითოეულ პროდუქტს მიუთითეთ სახელი, ერთეული (ცალი, ყუთი) და ფასი;
დაალაგეთ კატეგორიებად, რომ მაღაზიამ სწრაფად იპოვოს, რაც სჭირდება;
გადაამოწმეთ ფასები: მაღაზიას რომ ძველი ფასი დაუდგეს, პირველივე შეკვეთაზე დავა დაიწყება.

დღე 3: აირჩიეთ პირველი მაღაზიები

არჩევისას ნუ გაჰყვებით ყველაზე დიდ მაღაზიებს. ყველაზე კარგი კანდიდატი ისაა, ვინც:

ხშირად უკვეთავს, ამიტომ ახალი მეთოდის სარგებელს მალე იგრძნობს;
ტელეფონში კარგად ერკვევა და ჩატით უკვე მოგწერთ;
თქვენთან ნდობით არის და შეცდომას აპატიებს, სანამ ყველაფერი დაიხვეწება.

დაურეკეთ ან მიწერეთ პირადად. ერთი-ორი წინადადება საკმარისია: „ტელეფონით შეკვეთის გარდა, ახლა პირდაპირ კატალოგიდანაც შეგიძლიათ შეუკვეთოთ. თქვენთვის უფასოა და შეკვეთის სტატუსსაც ნახავთ.“

დღე 4-5: მაღაზიამ პირველი შეკვეთა გააკეთოს

მაღაზიისთვის შესვლა მარტივია: ნომერს შეიყვანს, SMS კოდს მიიღებს და თუ პირველად არის, მაღაზიის მონაცემებს შეავსებს (სახელი, მისამართი, ადგილმდებარეობა რუკაზე). ამ ეტაპზე ბევრს ეჭვი ეპარება, ამიტომ პირველი შეკვეთა ერთად გააკეთეთ.

სთხოვეთ, რომ ის შეკვეთა გააკეთოს, რომელიც ისედაც უნდოდა, არა სატესტო;
თუ ტელეფონით ესაუბრებით, სთხოვეთ ეკრანის სურათი გამოგიგზავნოთ, თუ რაიმე გაუჭირდა;
შეკვეთა მიიღეთ მაშინვე და მაღაზიას აცნობეთ, რომ მიიღეთ: ეს დარწმუნებას აძლევს, რომ სისტემა მუშაობს;
ის შეკვეთა ისე მიიტანეთ, როგორც ყოველთვის: ანგარიშსწორება მიტანისას უშუალოდ თქვენთან რჩება.

დღე 6-7: შეაჯამეთ და გადაწყვიტეთ, ვინ არის შემდეგი

კვირის ბოლოს დაუსვით საკუთარ თავს რამდენიმე კითხვა:

რამდენი მაღაზიიდან შემოვიდა შეკვეთა სისტემაში?
ვინ დაიბნა და რა ვერ გაიგო? სწორედ ეს უნდა აუხსნათ შემდეგ მაღაზიებს წინასწარ;
შეიცვალა თუ არა თქვენი შრომა: ნაკლები ზარი, ნაკლები ხელით გადაწერა, ნაკლები შეცდომა?
რომელი პროდუქტი აკლდა კატალოგში?

თუ პირველმა მაღაზიებმა ეს გზა მიიღეს, მომდევნო კვირას კიდევ ორი-სამი დაამატეთ. ყოველ ახალ ჯგუფს უკვე გაქვთ დადასტურებული ახსნა და მზა კატალოგი.

რას ეუბნებით მაღაზიას: ხუთი ძირითადი არგუმენტი

უფასოა: მაღაზიას სერვისში არაფერი ეხარჯება;
არაფერი დაგავიწყდებათ: ხედავს მთელ კატალოგს და ფასებს, ამიტომ რაოდენობასა და ფასში შეცდომა არ ხდება;
ხედავს სტატუსს: ტელეფონით დარეკვა აღარ სჭირდება, თუ სად არის შეკვეთა;
ერთ ადგილას: ერთი კალათიდან შეუძლია სხვა მომწოდებლებსაც შეუკვეთოს, თუ ისინიც სისტემაში არიან;
ანგარიშსწორება არ იცვლება: მაღაზია ისევ მიტანისას უხდის თქვენ.

სცადეთ Strelf

კომპანიისთვის · მაღაზიისთვის